भारत सरकारको सहयोगमा हुम्लाको सर्केगाड गाउँपालिकामा उच्च प्रभावयुक्त सामुदायिक विकास परियोजना (HICDPs) अन्तर्गत कृषि उपज प्रवद्र्धन केन्द्र निर्माण हुने भएको छ। यसका लागि भारत सरकार र सर्केगाड गाउँपालिकाबीच त्रिपक्षीय सम्झौता सम्पन्न भएको छ । सम्झौता अनुसार सर्केगाड गाउँपालिकामा कृषि उपज प्रवद्र्धन केन्द्र निर्माण गरिनेछ ।
केन्द्रमार्फत स्थानीय तथा रैथाने बालीको उत्पादन, संकलन, प्रशोधन, यान्त्रीकरण, व्यवसायीकरण तथा बजारीकरणमा सहयोग पुग्ने गाउँ पालिका अध्यक्ष ठान बहादुर रोकायाले बताउनु भएको छ । सम्झौतामा भारतीय राजदूतावासका विकास साझेदार काउन्सेलर अविनाश कुमार सिंह, भूमि व्यवस्था, सहकारी तथा गरिबी निवारण सम्बन्धी मन्त्रालयका उपसचिव होमनाथ काफ्ले र सर्केगाड गाउँपालिकाका अध्यक्ष रोकायाले हस्ताक्षर गर्नुभएको जनाइएको छ ।
सर्केगाड गाउँपालिकाले मिति २०८१÷०६÷१० गते प्रस्ताव पेश गरेको उक्त परियोजनाका लागि रु. ८ करोड ११ लाख ४१ हजार ३ सय ५१ बजेट विनियोजन गरिएको छ । परियोजना कार्यान्वयन भएपछि स्थानीय किसान तथा विशेषगरी विपन्न र गरिब परिवारको आयआर्जनमा वृद्धि हुनुका साथै कृषि क्षेत्रमा आधुनिकीकरण, व्यवसायीकरण र आत्मनिर्भरता बढ्ने अपेक्षा गरिएको छ। स्थानीय उत्पादनको संकलनदेखि प्रशोधन र बजारीकरणसम्मको व्यवस्था हुने भएकाले सर्केगाडको कृषि क्षेत्रलाई थप व्यवस्थित र व्यावसायिक बनाउन परियोजनाले महत्वपूर्ण भूमिका खेल्ने अध्यक्ष रोकायाले विश्वास ब्यक्त गर्नु भएको छ ।
